Հարգելի՛ բարեկամներ,

Ներկայումս բացառիկ հնարավորություն է ստեղծված Վանաձոր քաղաքում կառուցելու Մարդու իրավունքների հայկական դպրոցի շենքը` միջազգային ուսումնական ինքնատիպ մի կենտրոն մեր տարածաշրջանում, որը հաջողությամբ գործում և զարգանում է արդեն 15 տարի: Մարդու իրավունքների հայկական դպրոցը կլինի տարածաշրջանում մարդու իրավունքների, խաղաղության և ժողովրդավարության գաղափարների սփռման փարոս:

2011թ. դեկտեմբերի 14-ին` ժամը 18.00-ին <Արամ Խաչատրյան> մեծ համերգասրահում ՀՀ վաստակավոր արտիստուհի ԱՐՈՒՍ ԳՈՒԼԱՆՅԱՆԻ ղեկավարած <ՆԱԶԱՆԻ> ժողգործիքների համույթը կազմակերպում է բարեգործական համերգ-երեկո` <Իմ բաժին քարը Մարդու իրավունքների հայկական դպրոցի շենքին> նշանաբանով: Համերգից և նվիրատվություններից գոյացած հասույթը կտրամադրվի դպրոցի շենքի կառուցմանը:

Ձեր աջակցությունն այս ծրագրին կարող է լինել սույն տեղեկատվությունը ձեր շահառուների (երիտասարդներ, վետերաններ, տարեցներ, հաշմանդամներ, դպրոցականներ, մանկատան սաներ և այլն) շրջանում տարածելով, նրանց համար տոմսեր գնելով և/կամ պարզապես ձեր բաժին քարը նվիրաբերելով կառուցվող շենքին` մեկ քարի համար հատկացնելով ընդամենը 250 դրամ:

Վանաձորում կազմակերպված շարունակական մարաթոնի ընթացքում մինչ այժմ հանգանակվել է 3 363 540 դրամ կամ 13 454 քար: Ձեզնից շատերն էլ աջակցական նամակներով (տպագրվել են <Իրավական մշակույթ> թերթում) ու տասնյակ քարերով արդեն իսկ աջակցել են ծրագրին: ՄԻՀԴ շենքի կառուցման համար անհրաժեշտ է 440.880.000 դրամ կամ 1763520 քար (նվիրատուների ցանկին կարելի է ծանոթանալ http://www.acrpc.am/am/maraton.htm կայքէջում):

Հարգելի’ բարեկամներ,

Ձեր օգնությամբ ուզում եմ դիմել մեր բոլոր հայրենակիցներին, ովքեր կարևորում են մարդու իրավունքների իմացությունն ու հարգանքը, արժևորում շենքի կառուցումը, մտահոգ են մեր երկրի հավասարաչափ զարգացմամբ, մասնակցել համերգ-երեկոյին` նպաստելով Հայաստանում մարդու իրավունքների միջազգային ուսումնական կենտրոնի ստեղծման նվիրական գործին:

Տոմսեր կարելի է գնել համերգասրահի տոմսարկղից կամ մեր կամավորների միջոցով, ովքեր տոմսերը կբերեն ձեզ: Ներդրում կարելի է կատարել կանխիկ` համերգ-երեկոյի ընթացքում կամ փոխանցումով` համերգից առաջ կամ հետո մինչև տարեվերջ` 241011034139 (հայկական դրամ) բանկային հաշվեհամարին ՅՈՒՆԻԲԱՆԿ-ում, ստացող՝ Հայկական սահմանադրական իրավապաշտպան կենտրոն (ՀՍԻԿ ՀԿ), նպատակ՝ <ՄԻՀԴ շենքի համար>:

Տեղեկությունների համար զանգահարել (0322)22967 կամ 091 200-965 հեռախոսահամարներով:

Հարգանոք,

Գևորգ Մանուկյան