Հայաստանի Հանրապետության դատախազությունը (այսուհետ` դատախազություն), ՀՀ Սահմանադրությամբ իրեն վերապահված լիազորությունների շրջանակում, <<Դատախազության մասին>> ՀՀ օրենքով սահմանված դատախազի հրապարակային գործունեության, <<Հայաստանի Հանրապետության դատախազության և հասարակական կազմակերպությունների միջև մասնակցային համագործակցության>> կարգով նախատեսված դատախազության գործունեության հրապարակայնության և թափանցիկության, վստահության և փոխհամաձայնության սկզբունքների ապահովման, ինչպես նաև քաղաքացիական հասարակության ինստիտուտների մասնակցության, սերտ և շարունակական համագործակցության զարգացման նպատակով, վերոշարադրյալ սկզբունքների ինստիտուցիոնալ կենսագործման կարևորությունից ու անհրաժեշտությունից ելնելով` քաղաքացիական հասարակության ինստիտուտների միավորում հանդիսացող, Հայաստանի Հանրապետությունում գրանցված և Հայաստանի Հանրապետության տարածքում գործող ինքնակազմակերպվածության և կամավորության սկզբունքով ձևավորված ոչ առևտրային կազմակերպությունների <<Հանրային ցանց>> միավորման (այսուհետ` <<Հանրային ցանց>>) հետ կնքեցին սույն համագործակցության հուշագիրը (այսուհետ` Հուշագիր) ներքոհիշյալի մասին. 1. Դատախազությունը և <<Հանրային ցանցը>>(այսուհետ` Կողմեր) սույն հուշագրով ամրագրված համագործակցության ընթացքում կարևորում են հետևյալ սկզբունքները.
հասարակության մասնակցության ապահովումը քրեական քաղաքականության մշակմանն ու իրականացմանը,
մարդու և քաղաքացու իրավունքների և հիմնարար ազատությունների պաշտպանության ապահովումը,
քաղաքացիական հասարակության ինստիտուտների ինստիտուցիոնալ զարգացման խթանումը,
քրեական քաղաքականությանն առնչվող` հասարակության մեջ առկա խնդիրների վերհանումը, հանրային կարծիքի վերլուծումը, հասարակության տարբեր խմբերի շահերի հնարավորինս լայն ներկայացվածության ապահովումը:
2. Ընդունելով
համագործակցության ընթացքում <<Հանրային
ցանցում>> ընդգրկված
առանձին կազմակերպությունների անհատական կամ քաղաքական շահերի հետապնդման
անթույլատրելիությունը, ինչպես նաև Կողմերի գործունեության
իրավահավասարության ապահովման սկզբունքները, Կողմերը ամրագրում են
համագործակցության իրենց պատրաստակամությունը` հետևյալի շուրջ. 1) Դատախազության գործունեության ոլորտներին առնչվող տարատեսակ խնդիրների, հարցերի վերաբերյալ այլընտրանքային կարծիքների, հանրային շահերից բխող առաջարկությունների ստացման նպատակով, դատախազության կամ <<Հանրային
ցանցի>>համակարգող խորհրդի նախաձեռնությամբ, կազմակերպել քննարկումներ <<Հանրային
ցանցի>>խորհրդի կամ ցանցին անդամակցող կազմակերպությունների մասնակցությամբ. 2) Դատախազության նախաձեռնությամբ ապահովել <<Հանրային
ցանցի>>համակարգող խորհրդի կամ դրան անդամակցող կազմակերպությունների մասնակցությունը աշխատանքային նիստերին, քննարկումներին, միջոցառումներին. 3) ապահովել դատախազության ներկայացուցիչների մասնակցությունը <<Հանրային
ցանցի>>համակարգող խորհրդի կազմակերպած դատախազության գործունեությանն առնչվող քաղաքացիական ֆորումներին, սեմինարներին, կոնֆերանսներին և քննարկումներին, ծրագրերին: 3. Դատախազության կողմից խորհրդատվական կարծիքի ուղարկված նախագծերի և այլ փաստաթղթերի վերաբերյալ գրավոր կարծիք է ներկայացնում <<Հանրային
ցանցի>> համակարգող խորհուրդը: Միաժամանակ, ցանցին անդամակցող յուրաքանչյուր կազմակերպություն կարող է ներկայացնել իր կողմից կնքված և ստորագրված առանձին կարծիք կամ տեղեկանք, եթե այն չի համապատասխանում խորհրդի կարծիքին: 4. Սույն հուշագրով ամրագրված համագործակցության ընթացքում <<Հանրային
ցանցի>> համակարգող խորհրդի կամ ցանցին անդամակցող կազմակերպությունների բոլոր առաջարկները, կարծիքները, նկատառումները ունեն բացառապես խորհրդատվական բնույթ: 5. Առանց Կողմերի գրավոր համաձայնության <<Հանրային
ցանցի>> համակարգող խորհրդի որևէ անդամ կամ ցանցին անդամակցող որևէ կազմակերպություն դատախազության գործունեության վերաբերյալ չի կարող հանդես գալ ցանցի անունից` հղում կատարելով սույն հուշագրով ամրագրված դրույթներին: 6. Հուշագրով ամրագրված համագործակցության վերաբերյալ համատեղ արվող հրապարակային հայտարարությունները նախորոք քննարկվում և գրավոր համաձայնեցվում են Կողմերի հետ: 7. Կողմերը միմյանց անունից հայտարարությամբ հանդես գալու իրավունք չունեն: 8. Հուշագրով ամրագրված համագործակցությունը չի սահմանափակում Կողմերի Հայաստանի Հանրապետության տարածքում գրանցված և գործող այլ հասարակական կազմակերպություններիև պետական կառույցների հետ համագործակցությունը: 9. Հուշագրով նախատեսված համագործակցության աշխատանքները համակարգվում են Հայաստանի Հանրապետության դատախազության լիազոր ներկայացուցչի և <<Հանրային
ցանցի>> համակարգող քարտուղարի միջոցով: 10. Կողմերի նախաձեռնությամբ և համաձայնությամբ Հուշագրում կարող են կատարվել փոփոխություններ ու լրացումներ, որոնք ձևակերպվում են համապատասխան արձանագրություններով և ուժի մեջ են մտնում Հուշագրի 11-րդ կետով նախատեսված կարգով ու հանդիսանում են դրա անբաժանելի մասը: 11. Հուշագրի մեկնաբանության և կիրառման ընթացքում ծագած տարաձայնությունները Կողմերը լուծում են բանակցությունների ու քննարկումների միջոցով:
Հուշագրի գործողությունը դադարում է Հուշագրի պահանջները չպահպանելու դեպքում, ինչպես նաև Կողմերից մեկի` դրա գործողությունը դադարեցնելու մտադրության մասին մյուս Կողմին ծանուցելու պահից:
Հուշագիրը կնքվեց Երևան քաղաքում, 2010 թվականի հունիսի 10-ին, հայերեն լեզվով, անորոշ ժամանակով, բաղկացած է իրավաբանական ուժ ունեցող երկու հավասարազոր օրինակից, որոնք պահվում են յուրաքանչյուր Կողմի մոտ:
Կայքը պատրաստվել և սպասարկվում է Քաունթերփարթ Ինթերնեշնլի հայաստանյան ներկայացուցչության և ԱՄՆ-ի բնակչության առատաձեռն աջակցության շնորհիվ: Կայքի բովանդակությունը, արտահայտված տեսակետները և կարծիքները պատկանում են հեղինակներին և հնարավոր է, որ չհամընկնեն Քաունթերփարթ Ինթերնեշնլի հայաստանյան ներկայացչության, ԱՄՆ Միջազգային Զարգացման Գործակալության և ԱՄՆ կառավարության տեսակետների հետ: