ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
Հայաստանի Հանրապետության չորրորդ գումարման Ազգային Ժողովի
և քաղաքացիական հասարակության ինստիտուտների
միավորում հանդիսացող Հանրային Ցանցի միջև.
և քաղաքացիական հասարակության ինստիտուտների
միավորում հանդիսացող Հանրային Ցանցի միջև.
Սույն հուշագրով Հայաստանի Հանրապետության չորրորդ գումարման Ազգային Ժողովը (այսուհետ` Հայաստանի Հանրապետության Ազգային Ժողով) և Հանրային Ցանց միավորման մեջ ընդգրկված քաղաքացիական հասարակության ինստիտուտները`
կարևորելով երկրում քաղաքացիական հասարակության կառուցման ու զարգացման խնդիրները.
հաշվի առնելով Հայաստանի Հանրապետության Ազգային Ժողովի մշտական հանձնաժողովների իրավաստեղծ և օրենսդրական գործունեության ընթացքում հանրային և փորձագիտական կարծիքների ու առաջարկությունների ներգրավման անհրաժեշտությունը.
ընդունելով համագործակցության ընթացքում Հանրային Ցանցի,
դրանում ընդգրկված առանձին կազմակերպությունների անհատական կամ քաղաքական շահերի հետապնդման անթույլատրելիությունը, ինչպես նաև մշտական հանձնաժողովների կողմից համագործակցող կազմակերպությունների հանդեպ գործունեության ազատության և իրավահավասարության ապահովման սկզբունքները.
առաջնորդվելով Հայաստանի Հանրապետության Ազգային Ժողովի գործունեության հրապարակայնության, թափանցիկության ապահովման և սոցիալական տարբեր խմբերի շահերի հնարավորինս լայն ներկայացվածության սկզբունքներով.
Հայաստանի Հանրապետության չորրորդ գումարման Ազգային Ժողովի գործունեության ամբողջ ժամանակահատվածի համար ամրագրում են համագործակցության իրենց պատրաստակամությունը` հետևյալի շուրջ.
ա. ըստ անհրաժեշտության` Հայաստանի Հանրապետության Ազգային Ժողովի մշտական հանձնաժողովների գործունեության ոլորտներին առնչվող օրենքների նախագծերի տրամադրում Հանրային Ցանցի համապատասխան ուղղվածություն ունեցող հասարակական կազմակերպություններին` սահմանված ժամկետներում փորձագիտական, խորհրդատվական և հանրային շահերից բխող առաջարկությունների և կարծիքների ստացման նպատակով.
բ. ըստ նպատակահարմարության` Հայաստանի Հանրապետության Ազգային Ժողովի մշտական հանձնաժողովների նախաձեռնությամբ Հանրային Ցանցում ընդգրկված կազմակերպությունների մասնակցության ապահովում հանձնաժողովի նիստերին և հանձնաժողովի կողմից կազմակերպվող խորհրդարանական լսումներին.
գ. Հայաստանի Հանրապետության Ազգային Ժողովի օրակարգում ընդգրկված հանրային նշանակություն ունեցող այլ հարցերի վերաբերյալ հասարակական նախաձեռնությունների առաջադրման նպատակով Հանրային Ցանցի կամ նրանում ընդգրկված կազմակերպության(ների) կողմից կազմակերպված քաղաքացիական ֆորումներին, սեմինարներին, կլոր սեղաններին և քննարկումներին Հայաստանի Հանրապետության Ազգային Ժողովի մշտական հանձնաժողովների ներկայացուցիչների մասնակցության ապահովում:
Սույն հուշագրի շրջանակներում նախատեսվող համագործակցությունը չի սահմանափակում Հայաստանի Հանրապետության Ազգային Ժողովի մշտական հանձնաժողովների համագործակցությունը Հանրային Ցանցում չընդգրկված այլ հասարակական կազմակերպությունների հետ:
Հայաստանի Հանրապետության Ազգային Ժողովի մշտական հանձնաժողովների կողմից փորձագիտական և խորհրդատվական կարծիքի ուղարկված օրենքների նախագծերի վերաբերյալ Հանրային Ցանցի յուրաքանչյուր կազմակերպություն կարող է ներկայացնել իր կողմից կնքված և ստորագրված առանձին կարծիք կամ տեսակետ, եթե Հանրային Ցանցում իրականացված քննարկումների արդյունքում դրանց շուրջ չկա միասնական տեսակետ:
Համագործակցության ընթացքում Հանրային Ցանցի կամ դրանում ընդգրկված կազմակերպությունների կողմից ներկայացված բոլոր առաջարկներն ու կարծիքները ունեն բացառապես խորհրդատվական բնույթ:
Սույն հուշագիրը ստորագրված է 2010 թվականի դեկտեմբերի 2-ին Երևանում:
